Circuitu de música

Sestetu que transita per dellos estilos como’l funk, l’afro-jazz y, por supuestu, l’afrobeat, enllazando elementos variaos siempre vinculaos a la música de baille. La banda ta liderada por Samuel Akinola (voz, percusión y saxo altu), músicu nixerianu afincáu n’Asturies dende va un par de décades, que paez qu’atopó a los sos compañeros de viaxe ideales en The Afrobeat Brothers: Boris Abreu (saxo tenor), Antonio Izquierdo y Álex Fernández (guitarres), Luismi Garcia (batería) y Manu Cuervo (baxu).

Proclamáronse va poco ganadores del Concursu Nacional de Bandes de Música Negra na 10.ª edición del prestixosu Festival Imaginafunk; foron finalistes de los Premios AMAS y nel 2019 llevaron el gallardón al meyor grupu nuevu de los premios Enlace Funk.