Circuitu d´artes visuales

Davezu obsesionámonos con dar esplicaciones fuertemente cimentaes al orixe d’una obra, o d’un fechu artísticu nuevu. Y ye mui posible que dexemos de llau una parte mui importante de lo fundamental: la de la llibertá que ta nel principiu, nel ensayu, na rosa; nel proyectu del proyectu del proyectu…

Nesta fase de pruebes –la que comparte con nós Ramón Isidoro nestes series– ye mui posible que se revele lo xenuino: la obra neonata, pura, inocente, insociable. L’aniciu o l’aullíu. El bacilu y l’eureka. L’asombru o’l divertimentu. El rumor desnudu tovía d’oxetivos que mana serenu o exultante, pero nunca despreocupáu dafechu.

Esta esposición, oxetivu del oxetivu, déxanos dir a les fontes y disfrutar ensin prexuicios; trespasar la puerta del estudiu y hermananos col autor nos sos probables enriedos, pero, sobre too, na satisfacción de lo qu’afaya.