Guitarricadelafuente… Munchos son los elementos d´Álvaro Lafuente que remiten a les sos raíces, empezando pel diminutivu del nome artísticu, que fluye dende´l pueblu aragonés de los sos güelos. O esa inseparable guitarra acústica que tamién lu bautizó. Por eso la sofisticación qu´afronta garra na so música una dimensión especial: fascinante y seductora. El Guitarrica del 2022 doctórase dende una orixinalidá estrema, la mesma que lu convierte nún de los artistes más prometedores de la década nueva.

Esa especie de llugar míticu reinvéntalu Guitarrica de la mano de Raül Refree, ún de los productores más grandes del momentu. Xuntos descubrieron les enormes posibilidaes d´unes canciones qu´esploren caminos distintos, pero ensin perder enxamás el vínculu cola tradición tal y como la entiende l´artista.

Ye un pasu p´alantre bien decidíu pa un paisanu que se rebela contra l´encuadramientu y qu´inaugura una etapa na so trayectoria. Apóyase nel folclor o na poesía y escarba ente sonidos introspectivos pero coloríos. Ye una versión refinada d´aquel rapaz qu´un bon día se convirtió n´ídolu de mases y qu´agora pon enriba la mesa los sos argumentos de más talentu.

Pero too eso yá ye historia. Guitarrica renuévase y suena señardosu pero feliz, convencíu como ta de qu´una cosa nun ta reñida cola otra. Mez un panderu de Peñaparda con sintetizadores, pasa del bombu legüero a la so propia y peculiar guitarra y ximielga a Labordeta con Bon Yver. Les sos pieces suenen actuales, pero casen cola tradición nun puzzle con vocación d´obra selecta.