Muestra nel Pabellón del Principáu d´Asturies na Feria Internacional de Muestres d´Asturies

El Gobiernu del Principáu presenta nel pabellón de la Feria Internacional de Muestres d’Asturies (FIDMA), que se celebra en Xixón, la muestra espositiva La
Cultura Sidrera, esencia d’Asturies. Conexón natural, cola qu’axunta tradición, innovación y sostenibilidá, y que va mostrar al visitante la tresformación tan importante qu’hubo na rexón dende dos elementos fundamentales na configuración del paisaxe y del territoriu, como son la sidra y el ferrocarril. 

El visitante de La Cultura Sidrera, esencia d’Asturies va descubrir cómo güei la cultura sidrera evoluciona modernizando procesos, innovando y buscando la escelencia del productu, y too, ensin perder nenguna de les señes d’identidá más esenciales y tradicionales que faen d’esta cultura milenaria ún de los emblemes principales d’Asturies. Al traviés de paneles y audiovisuales, el públicu que visite’l pabellón va poder conocer les clases de mazana usaes pa facer la sidra, y descubrir un llagar tradicional o ún más modernu y toles empreses auxiliares que trabayen alredor del ciclu de la sidra. Amás, va averase a les característiques de la sidra espumoso y natural con DOP, primero de probar la so habilidá nel túnel d’echar sidra y sacar una semeya nun chigre tradicional asturianu auténticu.

El Pabellón del Principáu en FIDMA dedica, amás, la planta baxa a la llegada de l’alta velocidá a Asturies, un finxu importante nes comunicaciones de la rexón que va facer posible tanto’l tresporte de pasaxeros como’l de mercancíes, suponiendo una revolución pa la capacidá esportadora de la industria rexonal. Si hai un llugar onde’l ferrocarril y el mediu ambiente harmonicen, esi ye Asturies. Na esposición Conexón natural. L’Alta Velocidá llega a Asturies, l’Administrador d’Infraestructures Ferroviaries (ADIF) muestra, al traviés d’infografíes y imáxenes, los grandes llogros n’inxeniería, sostenibilidá y conexón que fixo na llinia d’alta velocidá que va conectar Uviéu con Madrid d’una manera envolvente y innovadora. Los visitantes van poder valorar y comprender los beneficios que va trayer la llinia nueva d’alta velocidá, llevar una semeya gracies a un espeyu interactivu y disfrutar d’un audiovisual inmersivu, onde los paisaxes asturianos garren un protagonismu especial, que descubre’l retu que supunxo pa la inxeniería española llibrar la muralla natural del cordal cantábricu nun proyectu que va crear una conexón natural d’Asturies col mundu.

Actividaes complementaries nel pabellón del Principáu en FIDMA

• Sábadu 6 d´agostu. De 12:30 a 13:30 y de 18:30 a 19:30 hores. Taller familiar “L´orixe de la sidra… les manzanes”.
• Domingu 7 d´agostu. A les 12:00 hores presentación del videoclip de la canción ganadora del Premiu al Meyor cantar y conciertu de Carla Armas ya les 19:00 hores festival musical de canciones tradicionales y populares alredor de la sidra y la manzana con Anabel Santiago.
• Xueves 11 d´agostu. De 11:30 a 14:30 y de 18:30 a 20:30 hores. InmerSidra: pon a prueba nun entornu de realidá virtual la to maña echando Sidra d´Asturies.
• Sábadu 13, domingu 14 y llunes 15 d´agostu. De 12:00 a 14:00 y de 18:00 a 20:00 hores. Actividaes d´animación Xuega A lo Grande y pon a prueba la to puntería y precisión col nuestru xuegu de la Rana xigante.
• Xueves 18 d´agostu a les 18:30 hores. ¡Ven a echar un culete! Masterclass participativa cola escanciadora polesa Loreto García.
• Sábadu 20 d´agostu a les 12:30 y 18:30 hores. Cuentos, pumaraes y llagares con David Acera.
• Sábadu 20 d´agostu a les 12:00 hores. Día de la Llingua Asturiana en FIDMA. Charra Sidra y tecnoloxía: una historia d´amor, charra cola historiadora y arqueóloga Arantxa Margolles.