Pola mor del 60 aniversariu del primer desfile del diseñador Yves Saint Laurent (Orán, Arxelia, 1936-París, 2008), el Muséu de Belles Artes d’Asturies súmase a les celebraciones que munchos museos franceses (Musée Picasso de París, Centre Georges Pompidou, Musée du Louvre, Musée d’Art Moderne, Musée d’Orsay y el Musée Yves Saint Laurent) tán desenvolviendo pa trayer como obra convidada una pieza testil que dialogue cola colección pictórica.

Nesta ocasión, trátase d’un vistíu tipu kimono pa Yves Saint Laurent, un prototipu de Tom Ford diseñáu alredor del añu 2000, onde’l pesu oriental que marcó dalgunes de les colecciones mítiques del creador nacíu n’Orán va guiar el diálogu con ún de los autores de la colección permanente del muséu asturianu, el xaponés Léonard Tsuguharu Foujita.