La Edá Media foi una dómina con bayura de música y instrumentos musicales. El conocimientu d’estos instrumentos reposaba davezu en manes de los homes de la Ilesia y de la corte, en tiempos d’analfabetismu xeneralizáu. Nesta mesma época, más concretamente nel sieglu XIII, el rei Alfonso X el Sabiu escribe les Cantigues de Santa María, un cancioneru onde apaecen representaos munchos instrumentos musicales y del que se caltienen dellos códices. Munchos d’estos instrumentos considérense na actualidá como tradicionales d’Asturies, como pue ser la gaita, el panderu cuadráu, les tarrañueles y el rabel.

Nesta ponencia-taller faise una introducción a los instrumentos medievales, munchos con orixe na Edá Antigua, como les arpes, llires y llaúdes, mentes qu’otros son inclusive de tiempos prehistóricos, como dalgunes clases de flautes y tambores.