El cursu Escribir realmente mal tien como oxetivu ameyorar la espresión escrita insistiendo nos errores más habituales nos que s’aveza a cayer a la hora d’escribir. Dalgunos son gramaticales. Otros tán rellacionaos cola manera de tratar el conteníu, como nun centrase no que se quier cuntar y, de resultes, fallar na estructura, escoyer un tonu poco afayadizu o escaecese de les característiques del interllocutor. Tamién hai una influyencia perversa y soterraña del inglés mal traducío y que se manifiesta en falsos amigos, traducciones indeterminaes y imprecises, xiros poco apropiaos y un etcétera llargu.