Circuitu d’artes escéniques

Planeta Joselín ye, sobre manera, una comedia asturiana, una comedia pa que los asturianos y asturianes se rían a gustu de les cuestiones del nuestru día a día, con situaciones, calteres y referentes perfectamente reconocibles pa toos ellos.

El resultáu ye una pieza abondo lloca con dos llinies d’acción: per una parte, la historia d’un adolescente, Joselín, que vive colos padres, Enedina y Claudio, nel “Tocote”. Joselín estudia na escuela taller y ta namoráu de Leyre, una moza del llugar. Pa conquistala, va tener el sofitu de los sos amigos (Amador y Titín) y los conseyos inestimables de so padre. Per otra parte, el públicu va descubriendo otra muncho más retorcida. Y ye qu’Enedina, la madre de Joselín, escuende un secretu escuru del pasáu qu’agora va tener qu’encarar y que, nel escenariu, va xenerar una riestra d’acontecimientos esparataos. Tenemos hasta un malu-malísimu llamáu Pandiella (José Marcelino Pandiella, semi-cazurrru, más conocíu nos campos de rexonal como “La perla d’El Bierzu”)

ALVERTENCIA: Esta obra incluye un asesinatu involuntariu, un derbi rexonal qu’acaba col árbitru nel ríu, una tortiella francesa de lexatinos y hasta media docenina de frixuelos…