El términu globalización paez que nos acompaña dende va relativamente poco; sicasí, les rellaciones comerciales diéronse en tol planeta dende que la humanidá existe: la Grecia antigua y la so espansión como fuercia militar; los viaxes a Oriente a partir del sieglu XIII; la Revolución Industrial, cola creación de medios de tresporte muncho más eficaces; la creación d’Internet y les tecnoloxíes nueves… Güei, el mundu ye muncho más pequeñu, pero l’aldea global empezó va munchu munchu tiempu.

Aveza a remarcase la diferencia ente países d’un llau al otru del mundu, anque nun planeta construyíu sobre una torre de cartes común, tou acontecimientu tien repercusión en caún de nosotros, por apartaos que teamos xeográficamente. Lo privao yá nun lo ye y cada asocedíu íntimu pue afectar a tol orbe. Quiciabes seyamos xugadores nun partíu de baloncestu planetariu ensin nin siquiera sabelo.

Run (jamás caer vivos) ye una historia sobre la globalización. Con munchos personaxes, treslladándonos dende la comedia hasta’l sarcasmu más tráxicu al traviés de lo narrativo y del humor, vamos indagar nes contradicciones y miseries humanes tan escomanaes a les que nos lleva una fuercia imparable como ye la globalización. Nada más teatral que lo contradictorio. Globalización: un fechu abondo grande como pa inoralu.