Baxo’l lema “Museos, sostenibilidá y bienestar”, los museos y equipamientos culturales del Principáu d’Asturies celebren el Día Internacional de los Museos 2023, que como cada añu promueve’l Conseyu Internacional de Museos (ICOM), cola mira d’averar al públicu’l trabayu que se desenvuelve en toos ellos a lo llargo del añu. Al traviés de programes educativos, esposiciones, actividaes de divulgación y investigación, los museos y equipamientos culturales asturianos tienen un papel fundamental que desempeñar na configuración y la creación de futuros sostenibles de la nuestra comunidá.

Museos pa descubrir la Prehistoria o la Historia, l’arte o’l patrimoniu, centros culturales alredor de les tradiciones o’l pasáu industrial, ente munchos otros, proponen actividaes y visites especiales que se van desenvolver ente’l 6 y el 27 de mayu.