El Liber Testamentorum o Llibru de los Testamentos, el códiz más importante del archivu capitular de la Catedral de San Salvador y ún de los exemplos más guapos de llibros miniaos del sieglu XII, ye la exa d’esta muestra. Al traviés de facsímiles, imáxenes y paneles esplicativos repásase la historia d’esti llibru, compuestu por mandáu del obispu Pelayo cola mira de recoyer les donaciones feches a la ilesia de San Salvador na Alta Edá Media. La serie de documentos copiaos abarca dende l’añu 812 hasta 1118 y tán adornaos con miniatures nes qu’apaecen reis, obispos y pontífices que favorecieron esta Ilesia.

El públicu que visite esta muestra tamién pue conocer el métodu usáu pa la creación de los pergaminos y otros códices españoles como la Biblia de Danila, Los beatos o’l Testamentu d’Alfonso II y observar el material d’un scriptorium, l’espaciu dientro de los conventos destináu a la copia de manuscritos polos monxos na Edá Media.

Los paneles de la esposición, emprestaos pol Centru d’Estudios del Alfoz de Gauzón, ellaborólos l’alumnáu del Grau d’Historia del Arte de la Universidá d’Uviéu. La muestra tamién cunta cola collaboración de la Fundación Valdés Salas y d’Andrés Antón Díez, presidente d’Asturies Caligrafía.

La muestra Testamentum complétase con una partida d’actividaes rellacionaes cola esposición:

• Artesanos del color. Ellaboración artesanal d’acuareles. 25 de payares de 10:00 a 14:00 hores.
• Charla Secretos de Scriptorium. 9 d’avientu a les 12:00 hores.

Collabora: 

• CEAG (Centru d´Estudios de l´Alfoz de Gauzón).
• Comisariu: Rubén Domínguez Rodríguez, Celia Argüelles Quirós, Deva Álvarez Argüelles y Isaac Cuello Rey.
• Fundación Valdés Salas.
• Andrés Antón Díez (Asturies Caligrafía).