La muestra entámala la Delegación de Defensa nel Principáu d´Asturies en collaboración cola Escuela d´Artes y Oficios d´Avilés.
Al traviés d´esta esposición quier mostrase´l marcu xeopolíticu del Mediterraneu nel sieglu XVI y les circunstancies históriques que llevaron al combate nel Golfu de Lepanto, los sos protagonistes, los medios que s´usaron, el desenvolvimientu de les campañes y les consecuencies de la victoria sobre la flota otomana, de la que se fai alcordanza dende entós n´obres lliteraries y artístiques.

Na esposición resáltase, al traviés de venti paneles esplicativos, dellos fechos históricos: un panel dedicáu a Miguel de Cervantes, un participante ilustre nesta batalla, otru pa representar los ecos de la batalla na Catedral de Toledo, onde, a lo llargo de sieglos (dende´l 1574 y hasta´l 1935), se celebró una fiesta llitúrxica cada 7 d´ochobre onde s´esponíen les banderes de la galera de Don Juan de Austria, la Real, regalaes por Felipe II y unviaes por Felipe III. Amas, otru panel recuerda a Don Álvaro de Bazán, el Marqués de Santa Cruz, almirante de la escuadra de galeres de Nápoles que mandó la retaguardia na batalla.