Circuitu d’artes escéniques

Un home, una muyer, una mesa, dos sielles, un recuerdu…

Cuando la historia yá ta escrita podemos mirar p’atrás al traviés de la memoria de los oxetos que nos falen de lo que fomos y de lo que somos, de los nuestros pruyimientos y vivencies, de la nuestra soledá y la nuestra compañía. Dos formes de percorrer un mesmu camín, delles veces cerca y otres na más completa de les soledaes, que resuenen cola distorsión de la memoria alloñada. Soníos y ecos de cuerpos que falen. Dos gotes nel océanu del tiempu.

Esta pieza ye un averamientu a la vieyera del ser humanu dende la rellación de dos personaxes que comparten el tiempu y l’espaciu de la representación. El so presente fúndese y tracamúndiase col so pasáu, l’equí y agora col recuerdu, el deséu cola realidá.