Impartida pola Dra. Adela Martínez Fernández. Investigadora responsable del Programa de Pastos y Forraxes del SERIDA.

Conferencia enmarcada nel ciclu de conferencies La producción láctea en Asturias: Evolución hacia el Reto Circular 2030. Ciclu de conferencies que se desendolquen nel mes d´abril coordinaes por D.Juan José Mangas Alonso y D.Tomás Emilio Díaz González, Miembros Numerarios Permanentes del RIDEA.

Ente los factores que llinden la rentabilidá de les esplotaciones na Cornisa Cantábrica pueden destacar l´amenorgada base territorial de la que disponen pa producir forraxes y la marcada estacionalidá de la producción forraxera. Pa superar dambes llimitaciones ye mester adoptar estratexes de xestión de la producción que garanticen la máxima inclusión de forraxes propios na ración, teniendo en cuenta que les característiques del forraxe d´una esplotación pueden ser el factor determinante de la cantidá y calidá de la lleche producida na mesma. Un forraxe de mala calidá llimita la capacidá d´inxestión de los animales ya incrementa notablemente los riesgos de perda de condición corporal depués del partu, cetosis, menor producción y calidá de la lleche, etc. Poro, xuntu con un bon manexu, l´empléu d´especies y variedaes apropiaes pa cada zona ye ún de los factores importantes sobre los qu´hai qu´actuar pa consiguir una meyora nel aprovechamientu de los recursos pratenses y forraxeros propios, tratando de rentabilizar al máximu la inversión realizada na implantación. Esto supón utilizar cultivos más eficientes, con baxos requerimientos de materia prima pa la so producción, menos demandantes d´agua y que nun degraden el suelu agrícola. Nesti procesu de busca de cultivos forraxeros ivernizos, que puedan representar una alternativa vidable al vallicu italianu, surdió un gran interés en toa Europa pola recuperación del cultivu de lleguminoses forraxeras, yá que, una mayor inclusión de lleguminoses nes raciones del vacunu llecheru puede facilitar la optimización de la relación ente enerxía y nitróxenu fermentables y supón una amenorgamientu de la síntesis de metanu nel rumen y d´emisión de dichu gas d´efectu invernaderu a l´atmósfera. Per otra parte, la presencia de lleguminoses, gracies a la simbiosis coles bacteries del xéneru Rhizobium, afita nitróxenu atmosféricu, arriqueciendo´l conteníu del suelu en dichu elementu fertilizante y ayudando a regular el ciclu del nitróxenu col consiguiente beneficiu medioambiental.