El cante de la española María José Llergo (Pozoblanco, 1994) ye un alegatu fondu –y atípicu– al compromisu artísticu. Revuelve. Tierra, corazón y instintu. Flamencu arreglao con tou tipu de soníos… Cambia’l vistíu, pero non el métodu: dexar que la música la atraviese y proyectala de forma xabaz.

Niña de las dunas (2018), el so primer tema, do it yourself dafechu,  presentóla al mundu xunto al guitarrista flamencu Marc López. Me miras pero no me ves (2019), escrito por ella mesma y coproducío pol sevillanu Lost Twin, que fala sobre la invisibilidá de determinaos colectivos sociales, consagróla como una de les voces a tener en cuenta. Un beat primitivu, esencialista, qu’axuntaba tradición y modernidá y que tamién s’alcontraba n’El péndulo (2019), defensor del equilibriu y títulu del primer llanzamientu físicu de l’artista.