Un estrueldu grande precede a una secudida fuerte, nun ye´l fin del mundu, anque lo paez. Ye l´empiezu d´una vida nueva, o eso lleí ayundes. Tamién, daquién díxome una vez que´l momentu más escuru de la nueche ye xusto enantes de salir el sol. Dalguna mañana, bien ceo, aparé a mirar el cielu pa contemplalu. Y esi estrueldu, esi secudión y la inmensa escuridá ye daqué guapo, dolioso y estelante al empar, como cualquier esplosión.

Dacuando, nesos momentos nos que too salta pel aire y la vida dientro y fuera ruempe en mil cachos, ye menester empezar un gran viaxe: al centru d´una mesma, esi sitiu esencial que, como nel centru del furacán, ye l´únicu sitiu que permanez sele. Un camín escontra´l realcuentru, a buscar los cachos, pa recomponer y reinventar la historia, la d´una mesma. Esta esposición recompón los cachos y conéctalos.

La muestra recueye una selección d´obra creada ente los años 2019 y 2020. Un preludiu. Una invitación a retornar a una mesma. Buscando un sitiu pa la quietú, pa recalibrar el rumbu. Una invitación a crear una vida meyor.