Nel marcu de les actividaes del cincuentenariu del Muséu Casa Natal de Xovellanos preséntase na Sala 2 del Centru de Cultura Antiguu Institutu la esposición Colección Museo Casa Natal de Jovellanos. El marco y su doble por Paco Cao, una esposición que, al traviés de la mirada del artista y historiador del arte Paco Cao, muestra la colección dende una perspectiva diferente y como fonte d´inspiración pa la creación contemporánea.

El creador Paco Cao ufiértanos una perspectiva de la colección que tien presente, de manera velada, una parte de la historia y circunstancies singulares de la ciudá de Xixón. La propuesta ofrez una reflexón heterodoxa sobre la percepción y llectura de la imaxe a lo llargo del tiempu, incluyíu´l periodu dixital nel que estamos somorguiaos.

El so conocimientu de diferentes disciplines, la so formación académica y la so esperiencia profesional –centrada nel desenvolvimientu de proyectos artísticos qu´establecen un vínculu fuerte ente la obra d´arte, el públicu y el contesto– allánen-y el camín de cara a desenvolver una investigación qu´axunte rigor histórico y actualidá, vinculando l´análisis de les colecciones a la creación artística contemporánea, col fin de definir y desenvolver derives especulatives nueves que dexen ufrir una llectura actualizada y diferente de les colecciones municipales.