La propuesta incluye esperiencies inmersives con realidá virtual, actividaes sensoriales, talleres participativos y accesu gratuitu a bien d’equipamientos culturales

La programación va empezar la fin de selmana del 16 y 17 de mayu

El lema d’esta edición, Museos axuntando un mundu dividíu, sorraya’l potencial de los museos pa fomentar el diálogu respetuosu ensin borrar les diferencies

La Conseyería de Cultura, Política Llingüística y Deporte súmase un añu más a la celebración del Día Internacional de los Museos con una programación especial que va enllenar d’actividaes culturales dellos equipamientos culturales asturianos na fin de selmana del 16 y 17 de mayu. La propuesta incluye talleres, visites guiaes, conciertos, esperiencies inmersives, actividaes familiares y xornaes de puertes abiertes pa públicos de toles edaes y con actividaes diseñaes específicamente pa públicu infantil, familiar y adulto.

La conmemoración, impulsada pol Conseyu Internacional de Museos (ICOM) col lema Museos axuntando un mundu dividíu destaca l’importante papel que desenvuelven los museos como pontes ente les divisiones culturales, sociales y xeopolítiques, fomentando’l diálogu, l’entendimientu, la inclusión y la paz dientro y ente les comunidaes de tol mundu.

D’esta forma, Cultura entama per tol territoriu asturianu actividaes especiales vinculaes al patrimoniu, l’arqueoloxía, la paleontoloxía, l’arte, la música y la tradición etnográfica. Ente les propuestes programaes figuren les visites a los llaboratorios y litoteques del Muséu del Xurásicu d’Asturies, onde’l públicu va poder conocer el trabayu científicu que se desenvuelve nel equipamientu; amás de participar en talleres infantiles de preparación y interpretación de fósiles, disfrutar d’audioguíes familiares protagonizaes pola dinosauria Devi y la paleontóloga Laura Icnita y asistir el día 17 a una visita especial cola participación del espertu arxentín Pablo Puerta, técnicu universitariu en Paleontoloxía y responsable de loxística de campañes paleontolóxiques del Muséu Paleontolóxicu Egidio Feruglio de Trelew, que va visitar Asturies pola mor de la campaña nueva d’escavación del dinosauriu de la playa de Vega. Tamién se va celebrar un taller pa conocer los trabayos variaos que se realicen nun equipamientu museísticu nel Centru d’Arte Rupestre Tito Bustillo; y visites guiaes gratuites al muséu; actividaes pa descubrir cómo facíen llume los nuestros antepasaos nel Parque de la Prehistoria de Teberga; xunto a visites guiaes a la Cueva de Cueves y entrada gratuita al equipamientu; y música y actividaes cola Asociación Cultural El Carpio nel Muséu Etnográficu de Grandas de Salime Pepe el Ferreiro, que va acoyer amás la entrega de los sos premios lliterarios y un conciertu del dúu Mestura.

La programación amplíase, amás, a otros equipamientos museísticos y culturales asturianos. El Muséu Arqueolóxicu d’Asturies va inaugurar el vienres 15 la esposición temporal Del Mediterráneo al Pacífico. El legado arqueológico de Manuel Bayón, una muestra integrada por más de doscientes pieces arqueolóxiques procedentes de distintes cultures del Mediterraneu antiguu y del mundu precolombín. Pola so parte, el Muséu de la Minería y la Industria d’Asturies (MUMI) va celebrar el día 19 una xornada de puertes abiertes y visites guiaes a la so esposición permanente. Tamién participa na celebración el Muséu de Belles Artes d’Asturies, que va enllargar la programación con talleres sensoriales, visites temátiques y actividaes participatives empobinaes a públicos variaos.

La programación incorpora tamién actividaes impulsaes por otros equipamientos culturales y museísticos, como’l Muséu Evaristo Valle, que va celebrar xornaes de puertes abiertes, visites guiaes y propuestes participatives vinculaes al arte y la naturaleza; el Muséu del Oriente d’Asturies, que propón percorríos sobre arquitectura indiana y memoria social; o’l Centru de Recepción y Interpretación del Prerrománicu Asturianu, que va ufiertar esperiencies inmersives con realidá virtual pa viaxar al sieglu IX y descubrir el patrimoniu prerrománicu asturianu dende una perspectiva innovadora.

La información completa sobre horarios, reserves y característiques de les actividaes pue consultase na páxina web de cada equipamientu cultural y nel documentu axuntu cola programación.