Los conceyos que conformen la Comarca de la Sidra acueyen del 5 al 8 de setiembre los actos conmemorativos del Día d´Asturies

El Principáu d’Asturies va celebrar esti añu’l Día d’Asturies na Comarca de la Sidra, que va ser l’anfitriona de los actos conmemorativos. Ente’l 5 y el 8 de setiembre, los conceyos de Nava, Villaviciosa, Colunga, Bimenes, Cabranes y Sariegu van enllenase de música, cultura y tradición nunes xornaes que reflexen lo meyor de la nuestra identidá colectiva.

A lo llargo de cuatro díes, la programación va combinar mercaos tradicionales, muestres d’artesanía y gastronomía, exhibiciones de deportes y xuegos autóctonos, actividaes infantiles y espectáculos de cai. Tamién va haber espaciu pa la participación de colectivos locales y asociaciones culturales, que van llevar la so creatividá y esfuerciu a una cita que cada añu aúne a toa Asturies.

El patrimoniu históricu y natural de la comarca tamién va tener un papel protagonista, con visites guiaes, talleres y propuestes pa tolos públicos, nun programa pensáu pa disfrutar en familia y abiertu a residentes y visitantes.

El Día d’Asturies va ser de nuevo, asina, una gran fiesta d’alcuentru alredor de les nuestres tradiciones, cola cultura sidrera como símbolu y nexu común.

ℹ️ Descargar equí el programa completu.

INFORMACIÓN IMPORTANTE PA LES ACTIVIDAES QUE PRECISEN RESERVA:

Pa les actividaes con places limitaes, les invitaciones retírense na web: https://entradas.turismoasturias.es/es/dia-de-asturias/

SARIEGU. VISITA TEATRALIZADA Y ACTUACIÓN MUSICAL NA CUEVA DE SAN PEDRÍN - 5 de setiembre a les 18:00, 19:00 y 20:00 hores

• A la Cueva llégase en tren turísticu. El puntu d’alcuentru va ser la Plaza de los Cayíos, Vega, Sariegu. N’acabando l’actividá va volvese al mesmu puntu de salida. Cómo llegar.
• Pa llegar a la Cueva va percorrese a pie un trayectu curtiu, con animación de personaxes de la mata.
• Actividá non accesible PMR
• Duración: aproximao 60 minutos
• Ye imprescindible tar nel puntu d’alcuentru 10 minutos primero de qu’empiece l’actividá, pudiendo perdese la reserva nel casu de nun llegar con esa antelación

SARIEGU. VISITA A LLAGAR TRABANCO - 5 de setiembre, a les 19:00 y 20:00 hores

• El recintu tien aparcamientu gratuitu na rodiada
• Cómo llegar
• Actividá accesible PMR
• Duración: aproximao 40 minutos
• Ye imprescindible llegar a lo menos 10 minutos primero de qu’empiece l’actividá

SARIEGU. YEGUADA FINCA MAEZA - 5 de setiembre, a les 19:00 y 20:00 hores

• El recintu tien aparcamientu gratuitu na rodiada
• Cómo llegar
• Actividá accesible PMR
• Duración: aproximao 40 minutos
• Ye imprescindible llegar a lo menos 10 minutos primero de qu’empiece l’actividá

COLUNGA. RUTA XURÁSICA PLAYA DE LA GRIEGA - 6 de setiembre a les 10:45 y 12:30 hores.

• A la playa de La Griega llégase en tren turísticu col acompañamientu de les mascotes del muséu. El puntu d’alcuentru va ser l’aparcamientu del MUXA. Cómo llegar.
• Non accesible PMR
• Duración: aproximao 60 minutos
• Recomendable llevar calzáu deportivo
• Ye imprescindible tar nel puntu d’alcuentru 10 minutos primero de qu’empiece l’actividá, pudiendo perdese la reserva nel casu de nun llegar con esa antelación

COLUNGA. MUSÉU DEL XURÁSICU D’ASTURIES. Música pa neñinos y neñines con dinosaurios con La Arca de Mozart - 6 de setiembre a les 11:00 hores.

• Han dir acompañaos d’una persona adulta. Retírase invitación namás pa los neñinos/es.
• Sala Talleres del Muxa

COLUNGA. MUSÉU DEL XURÁSICU D’ASTURIES. Mayáu de sidra y zusmiu pa neños/es - 6 de setiembre a les 11:00 y 12:30 hores

• 30 / 60 minutos de duración
• actividá pa toles edaes
• Xardín del MUXA

COLUNGA. MUSÉU DEL XURÁSICU D’ASTURIES. Yincana dinosidrera - 6 de setiembre a les 11:00 y 12:30 hores 

• Dirixío a: públicu familiar.
• Places: 6 grupos familiares compuestos por un mínimu de 2 y un máximu de 4 persones.
• Duración: 45 min
• Imparte: Blue Shape.
• Allugamientu: Xardín del MUXA.

VILLAVICIOSA. Visita a Llagar EL GAITERU - 7 de setiembre a les 16:30 y 19:00 hores

• A la visita llégase en tren turísticu con animación. El puntu d’alcuentru va ser la Casa Conceyu de Villaviciosa. N’acabando l’actividá va volvese al mesmu puntu de salida. Cómo llegar.
• Actividá accesible PMR
• ye imprescindible tar nel puntu d’alcuentru 10 minutos primero de qu’empiece l’actividá, pudiendo perdese la reserva nel casu de nun llegar con esa antelación.

VILLAVICIOSA. Visita a Llagar CORTINA - 7 de setiembre a les 17:45 y 20:15 hores

• A la visita llégase en tren turísticu con animación. El puntu d’alcuentru va ser la Casa Conceyu de Villaviciosa. N’acabando l’actividá va volvese al mesmu puntu de salida.  Cómo llegar.
• Actividá accesible PMR
• ye imprescindible tar nel puntu d’alcuentru 10 minutos primero de qu’empiece l’actividá, pudiendo perdese la reserva nel casu de nun llegar con esa antelación

Vuelo cautivu de globu aerostáticu. 

1. PARQUE EMPRESARIAL SANTOLAYA
2. CAMPU DE FÚTBOL DE NAVA

• Cada reserva va poder facese pa un máximu de 4 persones.
• Cada vuelu va facese siempre con 4 persones, independientemente de que la reserva seya pa menos persones, polo que ye posible que nun se puedan respetar los acompañantes de les reserves realizaes.
• Actividá non accesible pa PMR
• L’altor mínimu pa participar na actividá ye de 1,10 m.
• Los pasaxeros han asegurase de que son físicamente aptos pa facer el vuelu. Nun se va asumir responsabilidá nenguna por enfermedaes o mancadures que resulten d’una condición médica anterior. Los vuelos pa muyeres n’estáu de xestación o persones con osteoporosis tán contraindicaos.
• Cualquier pasaxeru ha ser quien a acceder, xubir, permanecer y salir de la cesta ensin ayudes esternes. Nun ye posible l’accesu al globu con muletes o otros sistemes d’apoyu.
• Prohíbese garrar en cuellu o upar a otru pasaxeru na ascensión.