Nel 2020 estrenóse ¿A qué suenen los llibros? un orixinal conciertu que xune música y lliteratura. Dende entós tien visitao Asturies, Cantabria, Aragón, Castiella La Mancha, País Vascu y Castiella Llión, en disitintos formatos, llocalizaciones y pa distintos tipos de públicu. El programa tampoco nun dexó d’amoldase a cada representación. L’Ensemble l’Arca actualiza’l repertoriu con nuevos llibros, nuevos y nueves autores, más xéneros lliterarios, estilos musicales y actividaes que nos dexen siguir descubriendo los rellabicos que xunen notes y lletres, párrafos y pentagrames.

Magar lo clásico del repertoriu, el conciertu enfócase con un ritmu más actual, presentaciones, variedá d’estilos, xuegos col públicu... Frañendo la barrera ente músicos y oyentes pa facer la escucha más cercana.