La histeria yera conocida como la gran bestia negra qu’apavoriaba a tolos médicos. La palabra vien del términu Hystera: ‘úteru’.

La Salpêtrière ye güei un hospital más de París, pero, a últimos del sieglu XIX, 4.000 muyeres (méndigues, fíes del adulteriu, güérfanes, ciegues, prostitutes, bohemies, lesbianes y un etcétera llargu) vivíen ellí, ente la realidá del día a día naquel sitiu y la representación teatral, desaxerada, exhibicionista y fotografiada, de la so enfermedá supuesta: la histeria.

Tolos martes convidaben a estudiosos y médicos (toos homes, por supuestu) a presenciar los ataques d’histeria que se suponía que teníen aquelles muyeres. Y elles, hipnotizaes, derrangaes (pue imaxinase) y rindiéndose énte lo inevitable, nun facíen más que cumplir colo esperao.
Esti espectáculu ye, de dalguna manera, un homenaxe a toes elles, pero tamién un intentu d’entendeles y, tovía más, de quereles. Ye tamién un espaciu de xuegu, onde’l simulacru de ser lo que nun se ye y de re-presentar de contino lo que s’espera dexónos abrir la puerta a otres muyeres que vinieron depués y que nos acompañen.

Quén me diere que daquella daquién, dalguna vez, mirare pa elles con un poco d’amor. Quién me diere.
Borja Roces.