Los xuegos de vigulín del músicu hispano-libanés Ara Malikian van reinar de nueves nel Centru Niemeyer. L´artista tan virtuosu va tomar l´escenariu del Auditoriu pa presentar n´Asturies los cantares del so últimu discu, Ara, nel marcu de la so xira internacional nueva The Ara Malikian World Tour, onde va suponer la so tercer parada nel espaciu cultural de la ría depués de los recitales tan existosos qu´ofreció nel 2014 y nel 2015.

Esti viaxe musical nuevu ye, en palabres del artista, «el resultáu de ver medrar al mio fíu, el resultáu de la medra al so llau; ye toos esos soníos y melodíes qu´intenten dar forma a lo que sentí y m´inspiró d´él y de la vida al traviés d´él. Ye un alcuentru col neñu que nun pudi ser y soñare ser.

En definitiva, un homenaxe a los neños, esos seres auténticos, salvaxes, tienros y sinceros que nun tienen mieu a equivocase, que son espresivos, llibres como los páxaros, y que les sos acciones tán enllenes d´arte.