Circuitu de cultura tradicional asturiana

Verde y Azul queden a ensayar. Una tiende la colada y la otra llega colos guevos que punxeron les pites d’una vecina. Nesi primer momentu d’alcuentru van falar de cómo-yos va la vida, de les xeres pendientes y van alcordase d’otres muyeres rurales que, enantes qu’elles, trabayaron la tierra, la casa propia y l’ayena y tolo preciso pa sacar alantre la familia. Muyeres de raza d’ayeri, de güei y de mañana.

Un diálogu que fai referencia a lo aprendío de les muyeres d’enantes y del gran heriedu que nos dexaron. Muyeres lluchadores que teníen munchos oficios non remuneraos, ames de casa, ganaderes, agricultores, costureres, cuntacuentos… Esti últimu, oficiu al qu’agora se dediquen les protagonistes y al que faen referencia ensayando n’escena un cuentu de tradición oral que la güela d’Azul-y cuntaba de neña.