Muestra nel Pabellón del Principáu d’Asturies na Feria Internacional de Muestres d’Asturies

La cultura sidrera, declarada anguaño Patrimoniu Inmaterial de la Humanidá pola UNESCO, protagoniza la esposición del estand institucional del Gobiernu del Principáu na 68 edición de la Feria Internacional de Muestres d’Asturies (FIDMA).

Col lema Asturies ye sidrera. Lo nuestro ye mundial, la muestra -comisariada por Luis Benito García- propón al visitante una inmersión na historia y la cultura de la sidra asturiano que, amás de suponer un gran atractivu turísticu, ta vinculada a una industria sostenible que supo axuntar tradición y innovación y construyir un treme gastronómicu basáu na máxima calidá del productu.

Na so visita al estand del Principáu, el públicu va somorguiase na historia, la evolución, les tradiciones y los valores qu’arrodien a la sidra asturiano y va descubrir la so rellación tan estrecha col desenvolvimientu rural, la sostenibilidá, la innovación y el turismu. El percorríu empieza na zona esterior, onde se va reproducir una vivienda tradicional con un horru col so llagar, y va siguir na planta d’embaxo, onde se va esplicar la dimensión del sector sidreru, la importancia del reconocimientu de la UNESCO y lo que supón pa la rexón al traviés de conteníu audiovisual, paneles esplicativos y material etnográfico.

El procesu de pañada y producción de la sidra va mostrase na primer planta, onde se va recrear de forma sensorial una pomarada. Tamién va haber sitiu pa los proyectos d’investigación que desenvuelve’l SERIDA y pa vivir una esperiencia inmersiva en 3D sobre’l procesu de mayar la mazana, amás de poder participar na creación d’una gran obra colectiva titulada La sidra compártese, vívese y recuérdase. Gracies por formar parte d’esta collecha.

El procesu d’ellaboración de la sidra, el de corcháu y los xuegos y vezos lligaos a la cultura sidrera tamién van tener el so espaciu nesta planta, onde los visitantes van poder disfrutar de la esperiencia global sobre’l ciclu de la sidra al traviés d’un videoxuegu o prebar dellos de los productos de les Indicaciones Xeográfiques Protexíes y les Denominaciones d’Orixe Protexíes con presencia nel estand.

Acaba la visita na planta d’embaxo, onde’l públicu va atopar un chigre tienda y una espicha y va poder poner a prueba, tanto tradicionalmente como virtualmente, la técnica d’echar la sidra. La muestra complétase col programa d’actividaes A les siete quedamos en chigre, que va dexar al públicu disfrutar de cantares tradicionales, cuntacuentos, talleres d’artesanía, prebes de sidra, talleres d’echáu o muestres en vivo d’actividaes cotidianes tradicionales.

Consulta´l detalle del programa d´actividaes y saca les tos invitaciones nesti enllaz (español).