Programa La Cinemateca Ambulante de Llaboral Cinemateca

Llaboral Cinemateca presenta una sesión qu’incluye una escoyeta de les últimes fornaes de curtiumetraxes incluyíos nel catálogu de distribución de Llaboral Cinemateca Curtios. Una bona muestra del cine asturianu actual en formatu curtiu que s’exhibe y esporta a decenes de festivales y muestres competitives a nivel nacional y internacional.

Duración: 75 min

Campolivar | Alicia Moncholí | 2024 | Docu-ficción

Tres de la muerte d’un pá distanciáu, propúnxime comprender la nuestra rellación tan rota visitando la so casa familiar, Campolivar, l’últimu sitiu onde lu vi va 8 años. Al traviés d’esti viaxe, la casa conviértese nun sitiu de reconexón col mio padre inestable y col universu de la mio infancia, agora desfragmentáu pol pasu del tiempu.

Susurros | Antonio Llaneza | 2024 | Coming of age

Asturies, mines abandonaes, coches del sieglu pasáu heredaos y tuniaos, post-rock y una pintada que se repite per tol valle que diz "Ulises maricón". La vuelta a casa na adolescencia tardía d’un baxista mozu na Asturies rural.

Soledá | Howi Álvarez | 2024 | Psicodrama

Una ganadera moza vive nun pueblu costeru cuasi deshabitáu, metida nuna rutina de la que nun pue salir. Convive con so padre, al que-y cuesta comunicase con ella. Cuando l’únicu vecín del pueblu se pon malu, el padre de la moza curia d’él dexando a la so fía sola al cargu de la casa y del ganáu.

Cola ausencia del vecín, el so perru pastor queda solu nes sos tierres, de les qu’escapa buscando al amu. La moza y el perru atópense ente medies de les sos soledaes respectives y empiecen una rellación d’amistá fiel que los ayuda a dambos a la hora d’afrontar la so señardá.

Voice academy | Javier San Miguel | 2024 | Fantástico

Una mañana, como por arte de maxa, un militar espierta con una voz nueva: infantil, ridículamente aguda, aseméyase estrañamente a la d’un dibuxu kawaii. El so descensu a los infiernos nun fixo más qu’empezar… 

Voice Academy preséntase como una trama fantastica y convida a reflexonar sobre la construcción de la identidá y la masculinidá.

La programación cinematográfica ufiertada por La Cinemateca Ambulante ta escoyida pol Festival Internacional de Cine de Xixón (Divertia Gijón S.A.).