Mayando s’entiende la xente ye un programa d’educación sociu-cultural que consiste n’averar a les persones a la cultura asturiana al traviés de la esperiencia de mayar a la manera tradicional. Emplegando 5 llagares en miniatura con capacidá pa 5 kg de mazana, les persones participantes van descubrir los secretos de la producción sidrera.

Les persones participantes tendrán d’armar primero les 36 pieces que componen el llagar, de siguío con unos mayos van tener que machucar les mazanes que depués van treslladar al llagar, onde van prensar la llagarada pa facer salir la sidra del duernu, que van poder tastiar al momentu. Mientres el procesu van dir conociendo detalles como les partes del llagar o les variedaes de mazana emplegaes.

En rematada esta primer parte de l’actividá, van desarmar el llagar y van ver l’estáu de la magaya, amás de recoyer les pébides que depués van poder llevar pa casa pa semar un pumar nuevu dende la semiente.