Cine-conciertu familiar cola proyección de Siete años de mala suerte, película de 1921 dirixida y protagonizada por Max Linder, considerada como una de les piedres angulares de la comedia cinematográfica dientro del cine mudu. Trata sobre cómo Max, a puntu de casase cola so novia, ruempe un espeyu y vese escorríu pola superstición, infortunios y les males decisiones, llevándolu a una fuxida caótica que va tar a puntu de llevalu a la cárcel.

Consideráu’l precedente directu de Charles Chaplin, Max Linder algamó una gran popularidá como cómicu de cine, marcando un paradigma nuevu del humor en pantalla: la del dandy y burgués elegante.

Doce Montes, nel so enfotu por recuperar del escaezu películes mudes, mesmo que volver dar vida a la tradición de tocar en directu mientres se proyecta, escueye Siete Años de Mala Suerte pa ufrir una perspectiva nueva al traviés de la so esperimentación musical.