La tradición sidrera nun entiende d’edaes. Inda cuando entá te queden años pa probar el primer culín, la sidra yá forma parte del to día a día. Una vegada al añu, l’amagüestu encárgase d’igualar a grandes y pequenos porque entós, ensin distinción, p’acompañar el cucuruchu de castañes, toos tenemos derechu a un bon vasu de sidra (del duernu).

La versión 0,0% familiar de “Tres botelles y un vasu” avera a los más pequenos les curiosidaes del mundu de la sidra: la so historia, el procesu, les tradiciones y por qué la sidra asturiana ye diferente d’otres sidres del mundu. Cada momentu de la narración ilústrase con una proyección d’imáxenes y tien la so propia música en directu, con distintos instrumentos musicales y estilos: melodíes medievales, tradicionales, populares…

L’espectáculu ye un primer pasu pa comprender la tradición, dende la moderación nel consumu y el disfrute ensin escesos. Una reflexón divertida y participativa sobre la tradición sidrera y la so importancia na sociedá asturiana.