Circuito de actividades de cultura tradicional asturiana

Cuando falamos de los instrumentos tradicionales asturianos, davezu piénsase na gaita y el tambor. Y n’efeutu son bien representativos de la música asturiana nel ámbitu públicu, anque n’Asturies tamién se tocaben otros instrumentos musicales como la pandereta o’l panderu cuadráu, que pol so usu principalmente en manos de les muyeres n’ámbitos más privaos y domésticos, nun ven reconocida la so importancia na música popular y el so papel na tresmisión del patrimoniu musical tradicional.

Con esta actividá búscase que la reciella se decate d’esta importancia y conoza al mesmo tiempu cómo son y cómo se toquen dellos instrumentos de percusión, sin escaecer los preseos del llar que tamién s’aprovechaben p’acompañar cantares y bailles.

Les neñes y neños pela so parte van facer pa sí un panderu cuadráu con material recicláu col que deprender dellos toques y cantarinos tradicionales asturianos. Asina van conocer les posibilidaes sonores y espresives de los instrumentos y tamién les de la so voz.