Places escoses

El Gobiernu d’Asturies, al traviés de la Conseyería de Cultura, Política Llingüística y Turismu, participa na celebración internacional del Día Européu del Camín de Santiago los díes 6 al 14 de mayu.

Itinerarios guiaos per tramos urbanos y rurales de los Caminos de Santiago n’Asturies, conciertos musicales, visites teatralizaes, charles divulgatives, espectáculos teatrales y talleres didácticos son delles de les actividaes que formen parte de la programación, a la que se sumaron dellos Conceyos asturianos.

El Día Européu del Camín de Santiago tien un calter claramente europeísta como’l que la ruta xacobea tuvo dende los sos oríxenes hai  1.200 años y celébrase al tiempu en siete países del continente, concebíu como una fiesta d’hermandá ente los europeos alredor d’una exa cultural que ye Patrimoniu de la Humanidá.

Asturies ta nel orixe del Camín de Santiago, yá que foi un rei asturianu, Alfonso II, el primer pelegrín a Santiago que rexistró la Historia, y quien favoreció la fundación naquel Campus Stellae de lo que col tiempu acabaría convirtiéndose na Compostela esplendorosa.

Un ermitañu viere na viesca de Libredón unes lluces estrañes que señalaben un sepulcru onde, según toles buelgues, reposaben los restos del apóstol Santiago. El monarca, Alfonso II, que la so corte yaba n’Uviéu, quixo treslladase col so séquitu a contemplar el so afayamientu colos sos güeyos propios, y ordenó llevantar nel sitiu un templete funerariu que punxo so la encomienda d’una comunidá de monxos.

Al Camín Primitivu, primer itinerariu del Camín de Santiago, que parte de les mesmes puertes de la catedral de San Salvador n’Uviéu, sumóse pronto otru, el Camín de la Costa, que percorría tol llitoral de la rexón. A estos añadióse’l Camín d’El Salvador, qu’usaben los pelegrinos del Camín Francés pa desviase hacia la capital asturiana a la altura de Llión. Los dos primeros foron declaraos Patrimoniu Mundial de la UNESCO nel 2015.

Los pelegrinos medievales, sobre too aquellos provenientes d’Europa, preferíen pa la so aventura’l llamáu Camín del Norte o Camín de la Costa, un percorríu de 815 kilómetros que travesaba’l noroeste peninsular siguiendo la llinia de costa dende Irún a Santiago de Compostela. Esti itinerariu tamién s’usó por aquellos pelegrinos qu’empezaben el viaxe per mar, embarcando en cualquiera de los puertos del norte d’Europa p’acabar desembocando nos puertos asturianos.

Ún de los atractivos principales d’Asturies nesta ruta ta na simbiosis ente’l mar y el monte, qu’acompañen l’andadura de los pelegrinos dende qu’entren na rexón pel conceyu de Ribadeva hasta que l’abandonen per tierres de Vegadeo, tres de 11 etapes y 263 km. El Camín de la Costa dibuxa un percorríu rural y marineru, énte too.

El conceyu de Llanes ta na primer y segunda etapa, onde’l pelegrín disfruta de tramos estraordinarios pela sienda costera, con caminos tranquilos y paisaxes guapos, pa travesar la villa histórica de Llanes y siguir hasta’l conceyu de Ribeseya.

Programa:

La ruta guiada va llevanos per un tramu del Camín de la Costa ente Andrín y Po ( Llanes) onde vamos acabar la etapa visitando una pumarada y llagar pequeñu.

Na comida vamos poder disfrutar de la gastronomía sabrosa de la zona.

Depués, vamos facer una visita al cascu vieyu de Llanes, declaráu Conxuntu Histórico-Artísticu y mui vinculáu a la tradición xacobea. Equí asiéntense la Basílica de Santa María, munches capiyes, el torreón medieval y la muralla, a los que tamién hai que sumar los “Cubos de la Memoria” pintaos por Agustín Ibarrola y ubicaos nel puertu pesqueru.

Horariu:

• 08:45 h. Salida n’autocar dende Uviéu.
• 10:15 h. Llegada a Andrín.
• 10:45 h.  Tramu Andrín - Po ( Llanes) (8 km. y 3 hores de duración aproximadamente). El percorríu va facese a pie.
• 13:45 h. Visita a una pumarada y un llagar.
• 14:30 h. Comida.
• 17:00 h. Visita guiada pel cascu históricu de Llanes.
• 18:30 h. Regresu hacia Uviéu.
• 20:00 h. Llegada aproximada a Uviéu.