La historia de la sirvienta que se tresforma máxicamente en princesa ta presente nes tradiciones folclóriques de la Grecia Antigua, la dinastía Tang en China, Les mil y una nueches, amás de nes antoloxíes de Perrault, los hermanos Grimm y –como toos sabemos– Walt Disney. Sicasí, en nenguna d’elles –que sepamos– se pronuncia la pregunta de resonancies hamletianes que sí escuchamos en La Cenerentola de Rossini.

Ello ye que, un sieglu y mediu de tradición de commedia dell’arte y otru más d’ópera buffa nun trescurrieron pa nada y, asina, l’últimu dramma giocoso del últimu gran representante d’esti xéneru batió toles espectatives daquella –la ópera llegó hasta Constantinopla, Buenos Aires, Calcuta y Sídney a namás unes poques décades de la so estrena en Roma– de la mesma manera que sigue ensin defraudar anguaño.